मुगुमा अस्पताल बनाउँन ८० लाख सङ्कलन

ललितपुर, भदौ २२– मुगु जिल्लामा अस्पताल निर्माण गर्ने उद्देश्यले गत आइतबारदेखि सुरु गरिएको श्रीमद्भागवत सप्ताह ज्ञान महायज्ञ आज सम्पन्न भएको छ । महायज्ञमा करिब रु ८० लाख सहयोग सङ्कलन भएको बताइएको छ । 

ओमरारा हेल्थ फाउन्डेसनद्वारा जावलाखेलमा आयोजित महायज्ञमा कथा श्रवणका लागि विभिन्न स्थानबाट आएका दाताहरूले आर्थिक सहयोगसँगै जग्गासमेत दान दिएका छन् । फाउन्डेसनका अध्यक्ष खड्कबहादुर शाहीले सरकारले दुर्गम जिल्लाको विकासका लागि बेवास्ता गरेको भन्दै मुगु जिल्लामा अस्पताल निर्माणका लागि सो अभियान सुरु गरेको बताए । अध्यक्ष शाहीका अनुसार आफूहरुले निर्माण गर्न लागेका अस्पतालको लागि करिब रु ११ करोडको अनुमान गरिएको भएपनि अहिलेसम्म आफूहरु दाताकै खोजीमा रहेको बताउँदै महायज्ञको अवधिमा विभिन्न समाज सेवी र राजनीजिक दलहरुको पनि उल्लेख्य सहभागिता रहेकाले सहयोगको थप आशा रहेको बताए । महायज्ञ मूल समारोह समितिमा अध्यक्ष एवम् उद्योग वाणिज्य महासङ्घका अध्यक्ष प्रदीपजङ्ग पाण्डे र ॐ हेल्थ फाउन्डेसनका अध्यक्ष डा भोला रिजालको सक्रियतामा महायज्ञ आयोजना गरिएको हो । महायज्ञको प्रमुख वाचकका रूपमा पण्डित दीनबन्धु पोखरेल रहेका थिए । आयोजकका अनुसार मुगु जिल्लामा हरेक वर्ष उपचार नपाएर धेरै नागरिकले ज्यान गुमाउनुपरेकाले त्यसमा केही राहत पुगोस् भन्ने लक्ष्य लिएर महायज्ञको आयोजना गरिएको हो ।

स्रोत (ratopati.com)

लेबलहरू: ताजा खबर, मुख्य खबर