२५ वैशाख, काठमाण्डौं । आइसीसी वल्ड क्रिकेट लिग डिभिजन थ्रीको उपाधि जितेर नेपाल फर्किएको नेपाली  क्रिकेट टोलीको भव्य स्वागत गरिएको छ । डिभिजन थ्रीको उपाधि उचाल्दै डिभिजन टुमा उक्लिएको नेपाली क्रिकेट टोलीलाई बर्मुडावाट बुधवार विहान त्रिभुवन अन्तर्राष्ट्रिय विमानस्थल ओर्लिए लगत्तै नेपाल क्रिकेट संघ क्यानका पदाधिकारीहरू, समर्थक तथा सुभेच्छुकहरुले भव्य स्वागत गरेका थिए ।

नेपाली टोलीको स्वागतका लागि पञ्चेवाजासहितको टोली विमानस्थल पुगेको थियो । यस्तै नेपाली क्रिकेटका समर्थकहरु नेपाली राष्ट्रिय झण्डाका विमानस्थल पुगेका थिए । यस्तै नेपाली क्रिकेट समर्थकहरुले क्रिकेट खेलाडीहरुलाई स्वागत गर्दै यो नेपाली शिर उचाली संसारमा लम्किन्छ, रातो र चन्द्र सूर्य जङ्गी निशान हाम्रो जस्ता गीत गाएका थिए । क्रिकेट खेलाडीहरुलाई स्वागत गर्न नेपाली क्रिकेट टोलीका कप्तान पारस खड्काका हजुरवुवा समेत विमानस्थल पुग्नु भएको थियो ।

जित सवै नेपालीको : पारस

त्रिभुवन अन्तर्राष्ट्रिय विमानस्थलमा पत्रकारहरुसंग कुराकानी गर्दै नेपाली क्रिकेट टोलीका कप्तान पारस खड्काले आफूहरुले डिभिजन थ्रीमा पाएको सफलता सवै नेपालीको सफलता भएको वताउनुभयो । उहाँले भन्नुभयो,’हामीले सुरुवाती दुई खेल गुमाएपनि हतास नभई खेल्यौँ । सुधारिएको प्रदर्शन गर्दै अन्तत डिभिजन थ्रीको उपाधि समेत जित्न सफल भयौ । यो जित सवै नेपालीको जित हो ।’ खड्काले अहिले पाएको सफलतालार्इ निरन्तरता दिनत आगामी दिनमा अझै कडा मेहेनत गर्नु पर्ने वताउनुभयो । उहाँले सवै खेलाडीको मेहेनत र राम्रो टिम वर्ककै कारण खेल जित्न सफल भएको वताउनुभयो ।

यसैवीच नेपाली क्रिकेट टोलीको सम्ममानमा नगर परिक्रमा गराइएको छ । नेपाली क्रिकेट टोलीलाई एयरपोर्टवाट सिधै गौशाला, रातोपुल, मैतिदेवी, डिल्लीबजार, पुतलीसडक, भृकुटीमण्डव, सहिद गेट हुँदै राष्ट्रिय खेलकुद परिषदमा पुर्‍याएर सम्मान गरिएको हो । नेपाली टोलीलाई राष्ट्रिय खेलकुद परिषदले बुधवार नै एक समारोहका वीच राष्ट्रिय क्रिकेट टोलीका प्रत्येक खेलाडीलाई सम्मान गरेको छ ।